قهوة 9:30

الاثنين، 3 مايو 2010


(دية حاجة قديمة كنت كتباها)September 3, 2009


لولو ميمي وجيجي اتصلوا
اتفقوا واتقابلو
راحوا علي قهوة 9:30
لا هي كيخا ولا أنح ولا البارون
طلبوا واحد شاي
وانا طلبت قهوة سكر زيادة
قالولي خليها سادة
اصل في تخفيضات وحيجيبوا واحد كركدية
حطيت رجل علي رجل وبصيت عليه
دة واحد بيشرب شيشة
ودة واحد بيلعب طاولة
عنيا كانت رايحة جاية
دية ماشية ودية نازلة ودية طالعة
دية بتضحك ودية بتترقص
دية بتغمز ودية بتتنأور

قلنا نعمل حاجة مفيدة
قعدنا نتفرج علي الوشوش
وش بيضحك
رحنا ضحكنا
وش مكشر
رحنا مكشرين
وش لا هو كدة ولا كدة
رحنا مستغربين
ماهو في ناس كدة وناس كدة
ناس ليها حظ وناس بتدور عليه
تجري وراة وهو يجري منها
قربت منهم قلتلهم هوس بس
قالوا اية
قلتلهم شايفين الوش اللي هناك

دة وش شايل من الهم فدان وحتة ارض
قلنا حنزرع الارض
وحتة الارض نربي فيها
قلنا يانربي بني ادمين
يانربي عقول
واحدة منهم وقفت وقالت يا ناس ياهو
طب والهم
قلنا اة نسينا
يايتهدم يا ييتلم
مايمكن الهم من كتر الجرح
يمكن من كتر القسوة والغم
يمكن عشان مراتة والزن
يمكن عشان عيالة اللي معندهمش دم
يمكن من طلباتهم اللي مبتخلصش
يمكن من العيشة واللي عايشنها
رد الوش وقال
يمكن عشان بحلقتكم
جاتكم الهم

12 comments:

اسماء واحلام فى وجدانى يقول...

ايه ده
انا اول تعليق
مع انى توبت من زمااااان
بس حظى
انى وانا جاى اسلم عليكى اكون اول واحد

صيدلانيه طالعه نازله يقول...

ههههههههههههههه
و الله صح
بتبحلقوا فى الراجل ليه
حاجه غريييييييبه

أنا - الريس يقول...

الوشوش بتحكي حكايات ..
قولي رويات ..
والنفس بتخرج اهاااات
بس فعلا يمكن كان بيحلق لكم .......

تسلمي علي الكلمات ....

تحياتي

غير معرف يقول...

الوجوه تحكي الكثير... وتخفي اكثر

اصبحنا نضع اقنعه عديده للاسف صعب تكتشفي ما تخفي خلفها

جميله اوي ومعبره

تحياتي

ستيتة يقول...

طب والهم
قلنا اة نسينا
يايتهدم يا ييتلم

حلوة حلوة
احلى جملة سمعتها عن الهم
في عمري كله

بحبك يا فيلسوفة بدري عليها الفلسفة قوي

Tarkieb يقول...

احلى حاجة ان الواحد يشوف وشوش الناس بجد مرايا للروح ...... كلامك جميل بجد...اول زيارة وان شاء الله نيجي القهوة تاني

سواحة يقول...

:-) شكلكم كنتم مكشرين فى وشة :-)

Haytham Alsayes يقول...

السلام عليكم

حلوة القهوة دي

تحياتي

حمدى جعوان يقول...

مساء الخير

انا حبيت اسلم

حصان المرجيحة يقول...

حبيت اعتذر عن غيابي لاني مشغول جدا
والله الشغل كتير و مش عارف ابص حوليا
ارجو تقبل عذري

momken يقول...

الغش..طرطش
رش عالوش بويه
مدرتش مين بيلياتشو او مين رزين

شاف الزمان وشى مش زى اخويا

تاهت وششنا بين زين وشين
ـــــــــ

الوجوه هى الترجمه المختصره لما تحتويه النفوس

فربما يخلص الوجه مالا يمكن ان ندركه باى وسيله اخرى

فانا ارى ان الوجه واللسان هما اهم وسائل معرفه ما تخبئه النفس البشريه


بوست هايل

تسلم ايدك

تحياتى

مدونة عرفة فاروق يقول...

السلام عليكم

يا ليتك لم تنشريه

نصيحة صادقة جدااااااا

لو كنت قد صنفت هذا على أنه قصيدة شعر عامى أو غنائى فلك لا لى لا تجربى نشره ثانيا

أنت تكتبين بروعة بالفصحى مالك والعامية

كل التحية