تاكسي

الأربعاء، 7 أكتوبر، 2009



وانا بقرا في كتاب

"حواديت مشاوير خالد الخميسي"

لقيت من احد القصص والحواديت قصة تدور احداثها بان الكاتب كان راكب مع سائق وبيتكلموا عن السيما والمسرح وايام زمان وتذكرة ب 5 ميلم وان السينما كانت بتعرض 3 افلام واحد اجنبي واتنين عربي وانة بقالة عشرين سنة مدخلش سنيما والدور والباقي علي ولادة قاعدين بيتفرجوا علي الدش في القهوة اللي تحتهم وربنا يستر علي اللي حيطلع في نفوخهم غير الصبر

وداس السائق علي زرار الكاسيت وكان صوت جاهوري لشيخ وانطلق باعوذ بالله من فتنه النساء فنحن في هذة الامة مفتونون بلمال والنساء كاسيات عاريات وذكر اسم الرسول صلي الله عليه وسلم بانة قال بان النساء فتنة بني اسرائيل وكان الكاتب يحاول ان ينطق ولكن السائق انطلق كلمدفع بان البنات بقت ابتلاء وانة مش حجاب دة اللي لابسينة وميغركش بنطلون محذق وفنلة وان فين الاهل

وينطلق الشيخ بان احد الشباب يقول بص ياشيخ فاذا بة ينظر ويقول اعوذ بالله من للشيطان الرجيم واننا كنا فاكرين ان عصر الفتنة انتيه في السبعينات عندما انتشرت الميكروجيب ولكن قد قربت الساعة في عصرنا هذا من شدة الفتنة ويقال ان حينما تجف بحيرة طبرية ستقوم الساعة وبيقولوا ان البحيرة خلاص مفيهاش غير شوية ماية

ويقول الكاتب لقد انقذت حينما وصلت ونزلت من هذا التاكسي قبل ان تحل بي لعنات هذا السائق واحمد الله اني لست بست حتي لم امت من حسرتي

وتذكرت موقف شاب ملتحي راكب اتوبيس وشغال احد الشيوخ في الكاسيت والشيخ بيقول احنا في زمن كاسيات العاريات اغض بصرك يااخي مع ان دة بقا صعب وشاب ينظر الي الارض ويقول اة يا شيخ واحسة يقولها بحرقة

يقول الشيخ

صوم يرد شاب في حصرة صومنا ياشيخ

يقول الشيخ وكانة سامع الشاب انا عارف انك نفسك تتجوز بس دة امر الله وبقا صعب واذا ارتضيتموة دينا فزوجوة

ينظر الشاب الي السماء ويرجع ينظر الي الارض ويلفظ ويقول الحمد لله

يقول الشيخ انا عارف انكم تعبتوا

يرد الشاب اوي اوي ياشيخ

وتشعر ان نساء اصبحوا ابليس هذا المجتمع





انا بس اللي مستغربالة ان زمان كانوا بيلبسوا ميني جيب وميكروا مكنش بيحصل تحرش وناس كانت عادي والامهات

لابسين فساتين احدث موديل وكان الدين الي حدا ما غائبا




ولما الدين بقا موجود حصل العكس ليه؟؟؟؟


38 comments:

Yusuf يقول...

حواديت المشاوير

حاولت اقراه كذا مرة ومكملتوش
كلامه مفهوش اي اسلوب ادبي
وبجد انا بستغرب ازاي كتاب زي ده يعمل اكتر من طبعة

بالنسبة بقا لموضوع التدوينة

الفكرة مالهاش علاقة بزيادة الدين
قد ماليها علاقة باضمحلال التربية والثقافة

المتدينين ( وهنا بتكلم عن الالتزام مش التشدد ) بيبقا عندهم قناعه ان الدين مش فرض علي الناس وانك تدعو الناس بالحسني

عرض رائع

تحياتي

حرروف يقول...

نورتني بانك اول تعليق

مش حتكلم عن اسلوب الكتاب ولا انة مفهوش اي لمحة اسلوب ادبي بس هو بيتكلم بلغه شارع صرف كانك قاعد سوري في تعبير ع مصطبة
انا كمان لسة مكملتش كتاااب

طب ولية مبقاش تربية زي زماان اية اللي حصل عشان يضمحل كدة ناس اتغيرت لية مع ان ناس بتوع زمان هما ابويا وجدي وجدتتي بتوع زمن التربية والاحترام

نورتني بزيارتك بجد

A.SAMIR يقول...

السؤال دة انا سألته لنفسي اكتر من مرة...و لناس كتير حواليا
ليه في الستينات و السبعينات كان اللبس اكثر عريا بكتير بس كان فيه اخلاق
وليه اللبس اصبح اكثر حشمة و انتشر الحجاب و النقاب لكن ماتت الاخلاق؟؟؟
مش لاقي اجابة حتى الان

ايوشة يقول...

لان الدين اتحول لمظهر مش جوهر كان لازم يبقى الوضع كده زمان الناس كان جوا منه نخوة وجدعنة واخلاق وتدين دلوقتى كله راح وبقى مظهر بس

آه وكفى يقول...

عشان الرجاله اهبلت يابنتي والله وعاملين فيها متدينين
اه والله
زمان كان في نخوه و البنت متخفش و هىلابسة الميكروجيب كبيرها اوي ان واحد سافل و ده كان نادراً هيبص بصه وخلاص لكن دلوقتي تلائي واحد بيبص وعماااال يبص وخلاص هيخرم البنطون ولا البدي بتاع البنت واحتمال كمان تلائي عينو لزقت اصلا في بنطلونها وتلائيه بيقول استغفر الله العظيم فين اهاليكم ,, ولما انته اخلاق اوي كده يامعلم بتبص ليييييييه ما تغض انته بصرك وخلاص :@


دي حاجة تفرس

طوبه فضه وطوبه دهب يقول...

ازيك يا اجمل حروف وحشانى موووووووووووت انا عايزه بقى اجاوبك على سؤالك عارفه ليه فى تحرش عشان بقى فيه كبت على الشباب من اللى بيشوفه فى الفضائيات وعلى كل القنوات وعلى النت وفى الاخر مش قادر يتجوز زمان كان الشاب باى امكانيات يتجوز كانت الحياه رخيصه ويخرج من الجامعه يلاقى شغل يقبض ملاليم يعيش بيهم ملك ويتجوز ويخلف ويحوش دلوقتى لو معاه كل حاجه بيتجوز ويبقى لسه فى حاجات ناقصه دا لو لقى شغل او جواز اصلا كل حاجه غاليه السكن غالى والمهور عاليه والشبكه والدهب غالين كل حاجه لازم كل ده يعمل اكبر كبت ويدفع كل شاب للتفكير فى اى شىء غير منطقى ما كانش يوم ممكن يفكر فيه ربنا يرحم الشباب ويعفه يارب

فاتيما يقول...

سؤالك محترم قوى يا حروف
و سالته لروحى انا كمان زمان
و شوية شوية وصلت لقناعة
إن الأخلاق و قلة الاخلاق
موجودين فى كل زمن و مكان
كل الحكاية إن فيه مناخ بيبرزهم
و فيه مناخ بيخبيهم
زمانا الحالى كل حاجة فيه
على عينك يا تاجر
و زى ما فيه تطرف فى الدين
بقى فيه برضو تطرف فى الحرية
و الصدام ما بينهم اعتقد إنه هيظل طوال الوقت
مقرتيش الكتاب
لكن شوفته فى ركوبى التاكسيات
و متصورة كم الغرائب
و العجائب اللى إنحكت و انسمعت
خالص حبى يا حبيبتى

يوميات الحارة يقول...

نايس بووووووووووست
ومافيش اى كومنت بعد كلام يوسف
واضافة ايوشة
لكن هيفضل سؤال استاذ // A.SAMIR
قائم للاختلاف سلوك فى اقل من 20سنة
الموضوع اخلاقى بحت جداااااااا
للان الاسرة مش بتربى على الاخلاق دلوقتى لضغوط وانشغال طرفى الاسرة فى لقمة العيش ومع انتشر وتنوع مصادر المشاهدة ونفوس مريضة ونفوس متعطشة للطرف التانى اكيد لازم يحصل دا ربنا يرحمنا ويحمينى اجمعين يارب من كل نفسى غادرة وعين اثمة

romansy يقول...

الله الله
فين بقى الدين اللى موجود يا خروف
شوفى هيفاء ونانسى والبشر دول
والكليبات اللى ملت الدنيا
صحيح احنا بنقفل التليفزويون
وهنعمل ايه تانى

بس اقدر اقولك ان فيه بنات محترمين كتير قوى قوى

romansy يقول...

معلش يا حروف
غلطه مطبعيه

شاب فقرى يقول...

المشكلة فى اكتر من حاجة :

1- البطالة
2- مدعين الدين اللى عمالين يتنططوا عالشباب كل واحد عايز يجمع الشباب بشكل وبيلعب عالوتر الحساس عشان الشباب يتجمعوا
هما مش فاهمين كدا انهم بيثيروا الشباب ويخلوهم يفكروا فى كدا بس
3- موجة الحياء الزائف اللى ظهرت ان البنت تبقى منقبة وممكن تبقى بتعمل البدع وبتغلط مع اى شاب او تبقى شكلها محترم وبتقول اللى انا معرفش اقوله
4- الثقافة اللى اتغيرت
بمعنى ان الناس بقت بتحاول تخرج الكبت بتاعها فى اى حاجة تلاقى مشكلة تفضى فيها غضبها

وصباح الاشتغالات يا بلدى

شيوخ على بنات مش فاهمه الدين على حركات من الناس وكله بيطبل

يعوض علينا ربنا

وانا عن نفسى بكره الشيوخ والبنات اللى كدا

تحياتى عالبوست الرائع

شاب فقرى

اسكندرانية يقول...
أزال المؤلف هذا التعليق.
Esmat يقول...

أعتقد إن الحياء قلته هو السبب
زمان حتى فترة قريبة كان الشباب يخجلوا يشربوا سجاير مثلا علنا أو يعلوا اصواتهم فى الشوارع او ينظروا لفتاة مارة أو يجادلوا مع الكبار أو يتركوا كبير واقف فى مواصلة وهم قاعدين أووو كتير.قل الحياء
إذا لم تستحى فافعل ماشئت
ده ملوش دعوة بالإنفتاح على العالم من خلال اغانى خليعة او افلام لان فيه افلام قديمة بشوفها لاول مرة الآن أندهش من المناظر والحوارات والملابس
والخمور اللى فى كل البيوت
إزاى قل الحياء لدرجة أختفاؤه عند البعض مش عارفة حقيقى
هل التربية لها دخل ومن البيت تغاضوا الأباء والأمهات على أساليب غير مهذبة فى ابنائهم فتجرؤا عليهم كده يبقى امتدد الاسلوب للخارج
يعنى برده تقصير فى التربية

ستيته حسب الله الحمش يقول...

مين قال لك انهم زمان كان عندهم قلة دين مع اللبس اللي كانوا بيلبسوه
دول كان لسه خارج من حداهم الإنجليز اهل الذوق
وسيبك من افلام رد قلبي والهبل اللي موله الضباط الأحرار
تعالي لحفلات الست ام كلثوم
شوفي الستات والرجالة اشكالهم عاملة ازاي
قاعدين في الحر بس كله ذوق
ولا واحد قام يشتم اللي قدامه والا اللي وراه
لا تحرش ولا حد بيبص على الست او البنت اللي قدامه ويوشوش اللي جنبه بنكته قبيحة
كانوا اصحاب مزاج
اصحاب اصول
متربين
احنا اهل اكتئاب
دين مظهري وكل واحد عاوز يحلف طلاق تلاتة للي جنبه انه مسلم ميت فل ماركة ان الحسنات يذهبن السيئات
ملناش في الأصول الا لو الحق عندنا مش علينا
ومعلش يا حروف
التربية صفر كبير مجوف من الداخل

Timo.. يقول...

"حريتي تنتهي حيث تبدأ حرية الاخرين "

حرروف يقول...

استاذ samir


طب لية بتلاقي الاخلاق في الاماكن الشعبية جدا؟؟

بمعني الجدعنه المروؤة الرجوله

الفكرة مبقاش في تحمل مسؤلية اطلاقا عن افعال اي شيء يعني تخبط حد بلعربية تهرب

تتحرش ببنت تهرب بردوا

فكرة ثواب والعقاب راحت من انفسنا ومن القائمين علينا

لقد استوطن فينا فكر انا ومن بعد الطوفان

الكل يجري ويلهث التراب حتي يحصل علي الرزق

مبقوش فاضيين يتلموا علي ترابيزة الاكل وقت الغدا او يناموا القيلولة ويصحوا يتفرجوا ويتلموا ع تلفزيون ويتكلموا حصل اية مبقاش كلام دة موجود

حرروف يقول...

ايوشة

حرد عليكي بجملة مسلمين لفظا بدون اخلاق

وفي الغرب اخلاق بدون اسلام

ومش بعمم مش الكل
يارب جملتي تتفهم صح

حرروف يقول...

اة وكفي

حقوللك يقول الله يلعنها بصي عاملة ازاي وهو بيبص لية؟
فين غض البصر حيقولك نظرة ليك ونظرة عليك وانت نظرتك لية جت في بنطلون الضيق وبضي هي مش نظرة بردوا في الوجوة

او واحد يجي يقولك ياا ختاة الحجاب علي اساس انك ماشية راسك عريانة مثلا طب وهو لية ستات مبتقولش كدة والراجل هو اللي بيقول

تناقدات لازم نتخلص منها

منوراني بعد طول غياب

حرروف يقول...

طوبة فضا وطوبة دهب

وحشاني ومنوراني وانا مقصرة اعذريني

تفتكري زمان مكنوش مكبوتين بردوا عارفه ايام البنطلونات الشرلستون وقصة شعر بوب مارلي ايام 73

يعني تحسي ان جيل ضايع وحربنا؟؟؟

طب ماهو الراجل بيبقي متجوز وعمال يبص ع بنات بردوا

ولما راجل عندة 60 سنة يتحرش ببت ويحاول يغتصبها دة اسمة اية ودوافعه ايه

انا بجد مش قادرة اعرف سبب اللي بيحصل

منوراني

حرروف يقول...

ممتي العزيزة

سؤال دة ملح عليا بشكل رهيب انا مش عارفه لية واية اللي بيحصل دة
بسم الله الرحمن الرحيم

لكم دينكم وليا ديني


دة ابلغ معني عن الحرية وان ربنا اللي بيحاسب

لية بنصب انفسنا جلادين للغير

تلبس ميكرو تلبس ميني النصح بمعروف وربنا اللي حيحاسب مش عقابا ليها اغتصبهاااا ونقول هي اللي غلطانةةةة

او ننصب انفسنا إله ونقول ان دة عقاب ربنا ليها في الدنيا

ماهو زمان كانوا ماشيين كدة ومبيجرلهمش حاجةةة

انا عايزة اعرف

وكل فوق ذي علما عليم ليه الشيوخ عاملين نفسهم بيفهموا ونحن لا نفقة شيء ولا نعلم كمثل دابة لا تعلم

لقد خلق لنا العقول لنتدبر لية بقينا في مرحلة بنسال يا شيخ هو انا لو معملتش سناني بسواك حرام ام حلال

بقينا بنطلب الفتوي في كل شيء ثم ننصب انفسنا اصحاب فتوي ونفتي نحن ايضا الدين له قدسيتة ومكانتة

انا حاسة ان احنا بنضيع تحت مسمي التدين والتعمق في الدين

مجرد ارضاء للنفس باننا كويسين في حاجة مش مهم الباقي غلط بس تبقي كويسين في دية حتي لو كنا بنسال وبنفتي في كل حاجة

يارب ارحمنا برحمتك

حرروف يقول...

يوميات الحارة

نفوس مريضة ومتعطشة لطرف الاخر يعني هو النوع البشري اتغير من زمان لدلوقتي ماهو زمان الولد ولد والبنت بنت
مكنوش متعطشين لبعض بردوا

لا اكيد متعطشين وعندهم الحاح دائم باستكشاف الاخر بس ولا كانوا بيضايقوا بعض ولا ينتهكوا اعراض بعض ولا اللي بيحصل دة

اية اللي جري

حرروف يقول...

رومانسي
طب شوف انت زمان سعاد حسني وصباح وميرفت امين وشمس الباردوي ؟؟؟؟؟؟؟


يعني هما زمان مكنوش مسلمين لا كانوا وكانوا بيتفرجوا علي الحاجات دية متنساش الافلام اللبناية اليل ظهرت في السبعينات

مكناش بنسمع عن مشاكل اللي بتحصل دلوقتي؟؟

ونسب الطلاق المرتفعه

واغتصاب طفلة عندها 11 سنة وغيرة وغيرة

واللي كان بيغلط كان في الظلمة
دلوقتي الغلط بقا في النور

انا مش مع اللبس الفاضح وان بردوا البنت غلطانةة

بس بتقلد اللي شيفاه بعنيها زي مابنقلد الغرب بظبط

قلة فرص زواج ففاكرة ان بكدة حتتجوز عقول صغيرة فارغه

ازدواجيه في التفكير
لان دلوقتيشباب عايزين بنات في جمال هؤلاء المغنيات المدعين بانهم مغنيات

دمت بالف خير اخي العزيز

حرروف يقول...

شاب فقري

سارد عليك بتفصيل

انتظر مني تعليقااا مفصلااا

لان موضوع كبير جدا

mahasen saber يقول...

لان نفوس الناس اتغيرت والاخلاق اتعدمت

ولان الدين بئا عند فئه ليست بالقليله مجرد مظهر
وتركوا التمسك بالجوهر

شاب فقرى يقول...

حرووف

بالإنتظار

:)

تحياتى وللحديث بقية

شاب فقرى

حاسوباتيه يقول...

والله دايما بسال نفسي السؤال ده ولما بسال ماما تقولي كان فيه اخلاق وقيم صحيح كان الدين مش ظاهر زي دلوقي لكن كانت الناس متربيه صح وعارفه الصح من الغلط وكانوا الرجاله رجاله بجد مش بتوع دلوقتي

Eno يقول...

السلام عليكم ازيك ياحروف

موضوعك ده انا فكر فيه كتير اوي انه زمان كان الدين غائب نوعا ما لكن كان في احترام عظيم بين الناس ودلوقتي لما الدين انتشر حصل عكس كده
حاجه غريبه جدا

يمكن يكون هو ده زمن الفتن الله اعلم :)

تحياتي:)

Eno يقول...

صحيح ياقمر سيبي ايميلك عندي في كومنت وانا هضيفك وهحذف الكومنت مش هنشره اقبلك علي خير ان شاء الله:)

Saso يقول...

بصراحه موش لاقيه تعليق بس دا حقيقى بيحصل.
بقينا متدينين ظاهريا ولكن داخليا ولاد تيت

غير معرف يقول...

فى رواية للشيخ احمد بن حنبل انه اثناء سيره فى احدى الطرق كانت امامه سيدة جاءت بعض الريح فتطاير جلبابها فظهر كعب قدميها فتعصب الشخ وقال زمنا زمن فتن

السادات

فشكووول يقول...

حروف .. السلام عليكم

الموضوع له اكثر من جانب

اولا: عودة محاكم التفتيش اللى كانت فى اوروبا زمان رجعت عندنا هنا فى مصر

ثانيا : انا من الجيل اللى كان عايش ومتعايش مع المينى جيب وكان كمان الميكروجيب .. يعنى يا بنتى كانت البنت بتمشى بجيب تقدرى تقولى عليه من غير جيب

الحمد لله هذه الايام البنات الى حد كبير محتشمات ولكن الدوله الدينيه تغلغلت فى المجتمع المصرى بشكل كبير والعادات والتقاليد المستورده والعائدين من الخليج وافغانستان استوردوا معاهم هذه الثقافه الدينيه واصبح المجتمع المصرى من لايلبس النقاب والحجاب كافر وزنديق.

انا لست مع العرى ولكن مع الحشمه ولكنى ارى ان هذه الدعوات هذه الايام اصبحت قويه طبقا للثقافه المستورده - ثقافة الوهابيين.

كمان لازم نشوف المتغيرات الاجتماعيه وانعدام اسباب الزواج وانعدام الديمقراطيه وثقة الشعب المنعدمه فى ولاة امورهم وانه ليس هناك اسوة يتأسون بها.وذوبان الطبقه المتوسطه والتى دائما ما تكون هى ميزان المجتمع .. اسباب كتيره قوى لما نحن فيه بالاضافه الى انعدام القدوه

المشايخ هذه الايام ليس لهم الا الحديث عن النار والثبور وعظائم الامور .. مع ان الله سبحانه وتعالى لو قرأتى سورى الواقعه لرأيت ان اسباب الترهيب اقل كثيرا من اسباب الترغيب واحنا قاعدين عاملين الموضوع حزن ومآتم والنار وما فيش غير النار مع ان هناك الجنه .. يتكلمون عنها قليلا او بالتوازى مع النار فكما هناك ترهيب يجب ان يكون هناك ترغيب .. وبعدين ما تنسيش السبوبه بتاعة الكاسيتات الدينيه والفضائيات .. سبوبه لا اكثر

تحياتى

م/ الحسيني لزومي يقول...

لان زمان كان فيه تدين حقيقي واسر اذا ما ربتش اولادها علي الدين بتربيهم علي الاصول مكنش التلفزيزن اتعري زي دلوقتي ولا حد كان بيحلم انه فيه نت ولا صحف صفراء

محمد الحسينى يقول...

موضوع جميل ومدونة اجمل ارجوا زيارة مدونى لانة تم نشر مواضيع جديدة

الحــ ــزين يقول...

الحــ ــزين
حلو اوى الموضوع دا

الحــ ــزين يقول...

الحــ ــزين
بس انا ممكن اتكلم بصراحة ولو سمحتى
اولا كل واحد فينا مسؤل عن تصرفاته قصاد ربنا
يعنى انا باعمل وحش هاخد جزائى غلط هاخد جزائى
بس العيب من الاساس فى الدولة لان من المفروض ان احنا نتمسك بدين الاسلام شويه وتقاليد الدين بتاعنا انا مش قصدى ان انتى تلبسى حجاب لان انا معرفش انتى لبسه ازاى بس فى الاول انا قلت كل واحد مسؤل عن نفسه قصاد ربنا
ولما شاب بيقول ان احنا تعبنا مش معناها زى ما انتى فاهمة لاء
معناها ان ربنا خالق جواه شهوة الشهوة دى حب النساء او انو عاوز يتفرج على حاجة عجبته ومتستغربيش للكلام .بس للاسف ان الدين بتاعنا امرنا منبصش للى مش لينا فاهنا دا قصده على الستات انما الراجل لبسه مش مباين مفاتن من جسمه
عموما انا اللى بقولك الست اجمل حاجة فى الدنيا
دومتى مملكت جمال

محمود محمد حسن يقول...

اهلا سالي ..

عارفة يا سالي الكيميا مش في الميني والميكرو بس .. الفكرة إن فيه جيل طلع بيفتقد القيم والأخلاق والمبادئ .. الأهل دخلوا المطحنة والمعجنة .. واولاد اول جيل بدأ يعاني من ازمة اقتصادية طاحنة .. اول جيل سافر الخليج وساب عياله .. اول جيل بقى يشتغل صبح وبعد الضهر .. ابناؤه طلعوا لينا ... طلعوا من غير مبادئ ولا اخلاق ولا قيم ... لأن الأهل كانوا في مطحنة الحياة ..

تاني حاجة .. زمان كان الواحد فاضي .. يجيب كتاب يقراه ...يجيب جورنال يقراه .. كان فيه ثقافة وحضارة .. دلوقتي فيه الدش فيه اكتر من متين قناة بتطل عليك بهباب وزفت وتفاهة وسطحية ... فبقى عندك جيل يفتقد الثقافة والحضارة والفكرة ...

تحياتي

Zika يقول...

صحيح والله زمان كانوا بيلبسوا skirt
وميني جيب
وحاجات لو اتلبست دلوقت يبقا شكلها ملفت جداا
سؤال محير والله .

سلمى يقول...

السلام عليكم
ربنا يهدى كل البنات
ويرزق الشباب زوجات صالحات