اسكندرية

الاثنين، 24 أغسطس 2009




مش عارفه ابدا منين بقرا بوست لهنودة حببتي وبتحكي فيه عن اجازة ليها وانها راحت محرم بك والساعه المكانين دول ليهم ذكريات عندي لدرجة اني من كام يوم حلمت بالساعه بلتحديد مكان هناك .........حلمت حلم مكنتش عايزة اقوم منة عدد المرات اللي رحت فيها هناك تقريبا 4 مرات او 5 مرات عدد بسيط بس ساب فيه ذكريات
انا فاكرة كويس الاحداث بس في حاجات كتير بتقع مني فاكرة اننا ركبنا ترام الاول من بحري ورحلة بقا بنعدي من باب واحد وطول ترام مماشي وبحس اني ف اسكندرية بجد ناس تصرفات الوشوش الترام البسيط اللي مش فاكرة رقمة ونزلنا كنا عايزين نشتري حاجات من ساعه انا وامي وخالتي وبياعين هناك اتفضلي يا انسة اتفضلي ياحجة عندنا كل حاجة اتفرجي بس واشتري بعدين وصوتهم ودوشة وزحمة وماما وخالتي كل محل يقفوا عندة وانا اتخنق واقولهم يالا بقا وفضلنا ماشيين دخلنا جوة كمان لقيناهم فارشيين ع عربيات هدوم وبينادوا باعلي صوتهم وبيرتجلوا كلام جميل بيخلي الابتسامة تطلع ع وش والواحد اذا كنت من قانطين الساعه فان لك مميزات بتشتري بارخص الاسعار ونفس الحاجة هي هي برا بسعر اعلي
ذكري تانية انا وامي وهي رايحة في زيارة محددة لواحدة ست عجوزة لوحدها انا مش فاكرة بيتها ولا فاكرة حاجة غير انها في كرموز وكان عندها فراخ بتربيهم وبتقطع اكل وترمية ليهم عشان ياكلوا وانا فرحانة اوي وانا بتفرج واخدت شوية وقعدت اكلهم
ذكري تالتة انا وامي بنجيب قماش ودخلنا محل واشترينا منة وبعدين طلعنا ماشينا ومش عارفين نركب من الزحمة وانا عايزة اروح بردوا لان ماما لما بتحب تروح مشوار بتنزلة من 9 صبح وانا كنت عايزة اناااااااام
ذكري الاخيرة لما رحنا نزور خالو الله يرحمة في المدافن هناك وبعد كدة طلعنا ع ساعه وبعد ماكنا جوة زحمة ومش عارفين نمشي وناس بتقول ولا كاننا في يوم القيامة تطلع برا تلاقي الدنيا ماشي بعد دموع والحزن وبكا والموعظة تلاقي الحياة وبيع وشرا الفصال
محرم بك انا معرفش فيها كتير انا رحتها مرتين مرة بترام اخدت ترام منشية لغاية محرم بك جوة والقهواي وناس ونزلت عشان اخد مواصلة ترجعني تاني المنشية اة والله فضلت ف ترام لاخرة وجة كمسري بيسالني نازلة فين قلتلة عايزة اركب مواصلة تواديني منشية قالي انتي مش من هنا قلتلة اة اتكسفت اقولة اني من اسكندرية ومش عارفه قالي اة ماهو جمال دة اكيد مش من هنا قلتلة اة من المنصورة قالي منا قلت بردوا قالي عايز عروسة من عندكم وانا كل دة عايزة اضحك قلتلة اة انشاء الله ووصلت لاخر الترام ونزل وشاورلي علي مكان المشاريع(يعني الميكروباص)
وركبت مشروع ومشي من تحت كوبري وطلع البحر
مرة تانية وانا في العربية ورايحين عند محالج القطن في مينا البصل ودخلنا من تحت كوبري
اة وفي مرة تالتة وانا فوق كوبري ورايحة كارفور وحاولت اجيب بعيني تحت معرفتش
مينا البصل قباري بحس اني بجد في حاجة كدة مش عارفه لسة فية شوية جرانيت هناك ترام مكسر كدة وقديم بحسة تراث القهواي الكتير اللي هناك ياااة بقعد ابص في كل قهوة وكل محل علي الناس اللي فيها صوت الطاولة تخبيط المعالق في كوبايات صوت القهوجي بينادي ع مشاريب الشباب قاعدين بيضحكوا بصوت عالي مع دخان شيشة كلة كدة مع بعضة بيقول انا هنا في اسكندرية
المكس وبيوت اللي ع بحر ومساكن ظباط هناك ولونها الباهت طاولات السمك وريحة السمك هناك بشمهم في مكانين بس المكس وحلقة السمك في الانفوشي وشكل الصيادين هناك لسة بيلبسوا زي الافلام ودايما هناك البحر عالي وريحتة مميزة وببقا نفسي انزل واقف هناك
بحري الزنقة المنشية القلعه محطة الرمل شارع فرنسا والمطافي صلاح سالم وبنوك وجامعه سنجور اللي وانا صغيرة نفسي اعرف اي مبني دة وموقف بعدية وشارع طويل هناك اللي لو مشيتة تروح ع محطة رمل ومحمصة شرف وقهوة اللي عند موقف اللي كنت لما اعطش اخش اقولة عايزة كوباية ماية (عادي بخش انا بحس هناك اني بتحول بكون جريئة عفوية زيادة فرحة زيادة احساس كدة مش بعرف اوصفة)
العيد في بحري بليل ولغاية الفجر سهر الاخوان بيكنسوا الشوارع بيفرشوا عشان صلي والله اكبر الله اكبر ولله الحمد وميكروفنات وبليل اخد بنات خالتي الساعه 12 بليل نتمشي من الانفوشي لغاية محطة الرمل واحنا مش بنبطل كلام ومعانا فلوس ومش عايزين نركب واحنا راجعين نركب ونحس ان لسة بدري لان شوارع كلها صاحية ولو دخلت شوية الانفوشي من جوة بعد قصر الثقافه تلاقي العريبات خفت يادوب ترام قاسم الطريق وناس نزلت من بيوتها اخدة كراسي ف اديها وحطاها ف شارع ولو كملت جوة تلاقي راس التين والقصر اللي كنت بروحة كتير وانا صغيرة انا لسة فاكرة الجنينة هناك في جنينة بطلعها فوق باب كنت بحب اخشها اوي ماما تشلني تروح مدخلهالي واقفل باب واعيش مع نفسي لعب
القلعه اول مرة رحتها وانا في ثانوية عامة انكجية انا وبابا يومها وقلتلة عايزة ادخل جوة ودخلني ورجعت غيظت ماما عشان بابا جابلي جيلاتي يومها من الصعيدي وقعدنا وبعدين رحنا قهوة فاروق وقعدني عليها كان احد احلامي اني اقعد ع قهوة وسط الناس وجابلي حاجة سقعد وكنت فرحانة اوي يومها
الترام ابو دورين لما بكون مضايقه بركبة رايح جي واقعد جمب شباك اركبة من محطة رمل لفيكتوريا والعكس رايح جي
النوة في اسكندرية والهوا يطيرني واقعد اضحك اضحك ولو لابسة جيبة افضل مسكها عشان متطرش
الصيف في اسكندرية الزحمة النور الكورنيش الساعه 8 عواميد نور القمر بدر بلنسبالي دنيا تانية
لما بنزل بحري بحس بفرحة ووشي بيترسم علية بسمة وكاني غايبة عنها انا بحس اني كانة عيد لما بنزل هناك يااااة البيوت كلها مفتوحة ع بعضها ناس حلوة هناك طيبين ميعرفوش يضحكوا في وش حد وهما في قلبهم حاجة وحشة السوق الميدان السكة الجديدة طلعت بتاع العصير سيف بتاع اللبن واكل عسل بكريمة صبح طيبين والهريسة هناك شوي السمك وتفضل واقف مستني وناس تقعد من زهق تتكلم وتشكيلك كانها تعرفك البيبان مش بتتقفل غير ع نوم داخلين عندك قاعدين او واقفين ع بابان بيتكلموا او في شبابيك واقفين بيتكلموا بيحكوا في كل حاجة معرفش دة من قرب شوارع وبيوت جمب بعضها تحسسك انك معاهم
هناك مفيش حاجة اسمها خصوصية وانك لوحدك في حاجة اسمها في فرحك في حزنك معاك حتي الخنقات هناك ياااة يموتوا بعض من الضرب وبليل او تاني يوم متصالحين
بليل امشي امشي لغاية نادي الكشافة وبعد كدة السور يوطي وبحر يبقا قريب وبعدين المراكب وعمارات الي قصادها كل بيت قصادة نخلة
امبارح بقول lovely alexandria اني بحس كاني متغربة زيكم معرفش لية بتكلم عن اسكندرية كانها وحشاني
انا حاسة اني بحبها بجنون
بجد عندي كلام كتير عنها وذكريات احلي كل مكان رحتة فيها كل غنوة سمعتها وانا ماشية في شارع من شوارعها طالع من كاسيت عربية او من كاسيت محل
او غنوة جاية من صدي صوت
وانا ماشية في شوارعها
لية ذكري عندي
انا بقالي كتير فاتحة البوم الذكريات
انا متلخبطة
انا متخبطة
انا مش عارفة مالي
مش عارفه عايزة اية
انا مش انا
انا تهت مني
انا مين وعايزة اية ياريت حد يجاوبني

17 comments:

hasona يقول...

السلام عليكم

كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه

وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم

وارزقنا العفاف والرضا - والمحبة واهدينا يا عظيم

وأعنا علي القيام والصيام والصلاة والارتقاءالي جنة الفردوس

واجعلها لنا ميراث خير وسعادة

واجعلنا من عتقاءك في هذا الشهر يا معطي يا وهاب

وارزقنا حلاوة القرآن و حسن تلاوته
وتدبر معانيه وفهمها علي النحو الصحيح
ورطب ألسنتنا بذكرك يا الله

Hanan Elshafey يقول...

لففتيني اسكندريه اللي معرفهاش






كل سنه وانتي طيبه
وبوست تحفه طبعا

شمس النهار يقول...

ازيك
وحشتيني جدا
انت فين اصلا
الذكريات الحلوه عمرها مابتتنسي
وخصوصا ذكريات الطفوله
انا كمان بحب اسكندريه بس في الشتاء
وليا فيها ذكريات كتير جدا
كل سنه وانت طيبه

وردشان smilyrose يقول...

صباح الخير يا سولى

اخبارك

ذكريات مع البحر

بتغظينى يعنى انتى عارفة ان معرفتش

انزل السنة دى بس عندى ليكى مفاجأة

هعيد معاكى ان شاء الله

ودايما ذكريات حلوة مع بحر اسكندرية

وحشنى قوى وعندى حاجات كتير عاوزة احكيهاله

زهرة الحب يقول...

السلام عليكم

كل سنه وانتى طيبه والله مدونتك جميلة وكلامك اجملوهاديه


تقبلى مرورى

>>> يقول...

السلام عليكم

مدونتك هادية وجميلة

وكلامك بسيط ورقيق

تقبلي مروري هنا

تحياتي

بَرَاء

Hannoda يقول...

تعرفي يا سالي
لما تكلمتي عن الانفوشي و شريط الترام و الناس اللي نازلة من بيوتها بالكراسي دمعت و جسمي قشعر و حسيت اني نفسي اكون من الناس دي

جميل قوي ياسالي لما يكون الانسان عنده القدرة على الارتباط بالحاجات و الاماكن و التفاعل معاها.. اللي بيقدر يحس بكده صعب قوي يحس بوحدة وصعب قوي يحس ان الدنيا فاضية عليه

على فكرة انا كنت بتكلم عن الساعة بتاعة فيكتوريا :)).. بس تقريبا نفس صفات الناس هناك..

انا كرموز مرتبطة معاي بالمقابر دايما ووفاه أختي الله يرحمها الكلام ده من سنين و انت عارفة الذكرى الموجعة في سن صغير بتتحفر

حتى لما ماما بتحاول تاخدني معاها للشرا من هناك بحاول اهرب منها عشان المود مايمسكش في

وحركة الترام رايح جاي دي بعملهاا دايما وياسلاااااام لو الصبح بدري جدا او وقت المغرب
عارفة اكتر حتة بحبها فين؟؟
المكان اللي بيعدي من قدام جناين الجولف بتاعة نادي سبورتنج.. وظهر العمارات اللي بين كليوباترا و سيدي جابر.. ماعرفش تعرفيها ولا لأ

فكرتيني بايام و اماكن واحشاني قوي و بفرح اما بفتكرها يا ساسو

الازهرى يقول...

من الانفوشى للرمل رغى
حرام عليكم
دماغكم ما بتصدعش ليه خرسانه
خلاص من سنين بعيده وانتم بعيد عن بعض
والا جاين من بلاد بعيده

اقول ايه بس ؟

كل سنه وانتم طيبين كلكم

Unknown يقول...

حروووف
---
شكراً لتعليقك

و يا مرحب بأهل اسكندرية كلهم
اصلى انا اسكندرانى

بوست جميل و عيشنى فى اسكندرية
اللى معرفهاش كثير

الازهرى يقول...

أنا زعلاااااااااااااااااااااااااااااااااان

مطلق يقول...

هي دي اسكندريه الي محدش يعرفها يا سالي

عاشقه الرومانسيه يقول...

اسكندريه ليها سحر خاص غير اى بلد
فى مصر وفى العالم كله
كفايا ريحه البحر فى يوم شتا
ولا منظر الغروب من شاطئ راس التين وجماله
و لا شوارعها اللى بتبقى زحمه موت فى الصيف
ولا جمالها وسحرها فى الشتا
ولا هواها وسماها وبحرها
حاجه تخلى الواحد يدوووووب وهو واقف على شطها
ولا جدعنة اهلها وشهامتهم
حاجه كده مش تشوفيها الا فى الاسكندرانيه
اشتياقك لها ده طبيعى جداااااا
اهلها بيشتاقوا لها وهما جواها
وعلشان كده باعذر اى حد يشتاق لها وهو بعيد عنها
يوووووووووووووه ده الكلام عنها عمره ما يخلص ابدا
ولو قعدنا نتكلموا عنها 100 سنه
دى اسكندريه ايووووووووووه ياجدعاااااااان

MY FATE يقول...

ياااااه اسكندرية حبيبتي بجد
فكرتيني بالبحر وريحته وذكرياتي هناك
ورحلتي مع أصحابي وحاجات كتييييييرة
"قلتلة اة من المنصورة"
احم أنا بقي من اسكندرية :D
حلو قوي سيرة المنصورة بلد المنشأ بتاعي :D
ابقي سلميلي على البحر أول ما تشوفيه عشان وحشني قووووي :)
سلااام وكل سنة وأنتي طيبة

thunder يقول...

بوووووووست جامد جداااااااااااا
جداااااااااااااااا
وانا بقراء متخيل نفسى فى كل مكان من اللى انتى اتكلمتى عنه
والله بجد تصويرك جميل وتحسيه طالع من القلب ويتحس بسرعة
دمت مبدعة يارب وبكل حب و ود وفى رعاية وحفظ الله دائما ياااااااااااارب

thunder يقول...

مبروووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووك النيو لوك الجديددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددددد
اول حد واربعاء وجمعة اعتقد يقولك هههههههههههههههههه ياله سلالالالالام يع يع وهو حلو كدا

فشكووول يقول...

ميمى واحمد بيقولوا ان عندك تفاصيل عن لقاء اسكندريه .. ولما جيت ما لقيتش حاجه

تحياتى

فشكووول يقول...

ميمى واحمد بيقولوا ان عندك تفاصيل عن لقاء اسكندريه .. ولما جيت ما لقيتش حاجه

تحياتى