ياذكرياتي .. متنسنيش

الجمعة، 23 أكتوبر 2009







احاسيسي متلخبطة وتخوف
بفتكر زماان زماان اوي والحاجات اللي كانت بتفرحني وتزعلني

انا فاكرة لما كنت بلعب مع ضلي علي الارض واحرك ايدي ولما ضلي يبقا وراياااا وامد قال يعني حد ماشي ورايا

لما بركب مشروع واقعد ابص علي العربيات وابص علي الواح ارقامهم واقرا ملاكي اسكندرية واشوف كام عربية مش ملاكي اسكندرية (انا فعلا مضايقة انهم غيروا النظام بلحروف عشان مش حعرف مين من اسكندرية)

انا فاكرة لما كنت بجري بستخبي ورا جدتتي عشان التتر بتاع ارشيف المحاكم
انا فاكرة ماما فضيلة
انا فاكرة النقطة البيضة اللي في التلفزيون الابيض والاسود اللي كان عند جدتتي
انا فاكرة نادي الشبان مسلمين لما كانوا بيعملوا المعرض فية
الترام القديم اللي مش بيمشي وكنت بضايق عشان بيتهز من جوا ومش بعرف اقف

انا فاكرة لما ببص من شباك المشروع وابص في وشوش الناس والاقي وشوش مكرمشة ووشوش بتضحك ووشوش
مضايقة وعيون فيها الم كنت بحس بيهم

انا فاكرة لما كنت اقعد اقرا اليفط واعلانات المحلات وكاني بتسابق اخلصهم الاول

انا كل مكان لية عندي ذكري بيفكرني بلناس وبشم ريحتهم فيه

اول مرة اروح السلسلة قعدت هناك والراجل بتاع غزل البنات اللي اشتريت منة واحد واتمنيت يكون معايا لب ابيض او حتي ترمس ساعتها وكنت مش عارفة استمتع بلمنظر والدنيا مضلمة وانور الكورنيش عاطية احساس اني مش لوحدي لان كل واحد معاه حبيبتة وكنت انا لوحدي وسطهم

وانا في عز الزحمة بحس اني لوحدي

ساعات بمايل راسي عشان اشوف الدنيا بلعرض واحس بلنور والعواميد بليل

لما بتيجي الساعه سبعه بحب الوقت دة العواميد الكورنيش من بعد الشاطبي لغاية سيدي جابر
واتفرج علي الحيطة بتاع المستشفي

انا كنت بضايق من الشارع بتاع المستشفي والجدار العسكري  اللي عندة المدفع كنت بتخنق منة اوي وبضايق ولغاية دلوقتي بضايق من الشارع  عشان مش بعرف احسة واول ماطلع منة علي البحر كان روحي بترجعلي وارجع افرح بمنظر البحر

القمر وهو بدر بيفرحني بحس ان اليوم جميل وبنتظر حاجة تحصل وكان في اليوم اللي في القمر بدر حاجة حلوة حتفرحني

بفرح اوي لما يكون القمر بدر يوم الخميس بحس ان اليوم عيد ان الدنيا بترسم فرحة في وشي ببقا عايزة اخرج اتفسح سعتهاا ولو معرفتش اخرج بدخل البلكونةةة احط راسي علي الجدار وضهري لحيطة الدار وابص لفوق للقمر للسما بحس اني من غير جاذبية واني ممكن اقع بس بردوا بحس اني مش شايفه عمارات او حد كاني في الفضا البعيد

لما بكون علي البحر بغمض عنيا واسمع بس صوت الامواج ولو الدنيا شمس بحس بيهاااا لان الدفا بتاعها بيوصلني وعنيا من جوة حساها عشان جفوني بقا لونها برتقالي وساعات بيبقي احمر


لما بضايق بمشي في الشوارع اشكي واحكي وافضفض ولو معايا حد مش ببقا مرتاحة
ولما اضايق اكتر مش بشوف ناس بشوف لمعه فاترينات المحلات وانوار العواميد وبحبس دموعي عشان لسة حاسة بان الناس حوليااا

انا لما بتفرج علي صورة بفتكرها بحسها برجع بذاكراتها  وافتكر لما اتصورتها وفرحتي او حزني فيها
حتي ريحتها بشمهااا

انا فاكرة لما اتحكالي قصة سيدنا سليمان وبقيت ببص للحيوانات واكلمهااا واقول حتفهمني ولما كنت اشوف حماار علي عربية كارو بتاعه خضارر اخد من الراجل جزراية واكلة

مرة كنت نازلة علي السلم لقيت قطة قعدت اقولها متخافيش انا نازلة بس مش حاجي جمبك وزعلت اوي انها جرت بردوا ومتطمنتش ليا

انا دلوقتي عرفت لية وانا صغيرة كنت بزعل لما حجتي تتكسر او تبوظ

مش عارفة كان حاجتي حته مني مينفعش تنكسر او تبوظ

انا لما بطلع من الكلية بركب الترام وبلرغم ان المسافه كبيرة اوي الي اني بصر اركبة واستني لغاية مايجي ابو دورين حتي لو كان رقم واحد لانة بيتاخر واركبة واطلع فوق ومع اني لوحدي ومع ان اغلبة بيكون شباب ورجالة بديهم ضهري واقعد ابص لشباك وفي ايدي البيبسي واحس اني سرحانة وبفكر

وافكار كتير في عقلي شغالة بس مش عارفة امسك فكرة واحدة منهم
انا شوية حاجات بتفرحني ذكرياتي مع الناس والاماكن بحب اروحهاااا وامشي في نفس المكان وافتكر كل حاجة حصلت

كل اللي انا حساة دة دلوقتي
بسبب شوية صورة رجعت اتفرج عليها
بسبب ناس سافرت وناس حتسافر وكانهم بيودعوني ويسبوني هنا لوحدي

برغم حنيني اوي لكل ذكري ولكل مكان كانت فيه الذكري دية الا اني عندي شعور قوي باني عايزة اسافررر

واتفرج علي الناس من بعيد واتفرج عليا وانا مش جوة الصورة

32 comments:

Cute Kitty **sookra يقول...

قلت اصبح واكون اول تعليق وبعدين اروح اقرا وارجع تانى
صباح الحروف المتظبطه ياست حروف
اخدتى الاستمورننج ولا لا يابنت انتى

ستيتة يقول...

حروف
شوفي انت كتلة مشاعر تمشي على الأرض
وانت بتحكي تخيلتك مش من البلد دي
تخيلتك بجنسية تانية وفكر تاني
اعتقد كنتي ها تبقي أديبة لامعة
كنتي ها تتركي العنان لفيض المشاعر ده بلا اي تحجيم
مشاعرك الفياضة دي ساعات بتبقى عاملة زي الإشارة الصغيرة قوي
والمشاعر دي بتكبرها
شيء مش عارفة اوصفه
بس حلوة ذكرياتك
اطمني لا ها تنساك ولا ها تنسيها
والجاي احسن كتير واجمل بإذن الله

حروف يقول...

خالتوو

صباح الخير

قريت كلامك لقتني بكيت

معرفش لمسني اوي اللي بين الكلام
او يمكن اللي لمسني اني حسيتك حضناني بتبطبي عليا

او حسيت انك علي الاقل حساني

Cute Kitty **sookra يقول...

لولوووووووووووووووووووووووووووووووووى
الاول بجداره
كنت غصب عنك لما نتقابل يوم 4 /11 موش هتنازل عن الشيكاليته بتاعتى
ههههههههههههه
صباحك شيكولاته بيضا بس عشان الحسد

Cute Kitty **sookra يقول...

حروفك دايما منوره الكلمات وبتديها احساس تانى خالص
عارفه البوست بتاعك دا اشاره لحاجه عندى
انا احيانا بقول ياريتنى مادخلت عالمكم
عالم المدونات دا لان كتير بلاقى بوستات ناس تانيه بتحكيها وابقى عاوزه اقولهم انتوا بتحكوا عنى انا يارداله
لكن بتكسف اصلى مكسوفه
المهم الاحساس دا بيخلينى اكتشف يوم بعد يوم اننا بنتفق فى حاجات كتير وبنتشابه فى حاجات اكتر بس بسأل نفسى سؤال ليه ياترى مادمنا بنحس بنفس المشاعر ,ليه موش بنحس بعض اكتر من كدا ,ليه موش بنفهم بعض اكتر من كدا .
كلامك حلو اوى ياحروف وتستاهلى عليه حضن كبيييييييييييييييير وبوسه جامده اوى
اموووووووووووووووووووووووووه
تحياتى ياسوسو

اسماء واحلام فى وجدانى يقول...

اولا صباح الخير

بس دى خيانة لان التقارير اللى عندى قالت ان مفيش البوست الايام دى باين كده ان جواسيسى مش شايفين شغلهم صح هنشوف الموضوع ده بعدين


مش عارف يا حروف احساسك ده هو نفسه احساسى كل حد اسكندرانى ولا ساحلى مش عارف الناس اللى برة اسكندرية عندها نفس الاحساس ده و لا لآ احساس حب البحر والكورنيش والمغربية والشمس والشتا ،،
بس انتى ميزتينا فى حاجات جميلة ارشيف المحاكم اللى لحد دلوقتى لو سمعتها لوحدى باخاف من الموسيقى بتاعتها
وعادة انى ادقق فى لوحة العربية كنت باحبها اوى لامة اكون برة اسكندرية كان من النادر لامة اشوفها بس كنت باحس ان حتة منى معدية ،، ده فى مرة شوفت تاكسى اسكندرانى فى القاهرة روحت رايح مخبط على الناس اللى جواه وسلمت عليهم الناس استغربت منى اوى ، بس بعد ما اتكلمنا تقريبا فهموا انا كنت عايز اقول ايه ، الجنان له ناسه يا بنتى ،، كلامك ده بيخلينا نرجع كتير اوى ونفتكر ايام جميلة اوى

romansy يقول...

عارفه الانسان من غير ذكريات مش يبقى انسان
الذكريات حاجات جميله وذكريات اجمل بكتير قوى لما تكون مع اشخاص بنحبها ومؤثره فى حياتنا
دايما كنت بحب العب تحت المطر وبغنى مع العيال اللى فى الشارع
وكانت حاجات جميله قوى قوى
دا احنا كنا عيال قوى قوى

قلب ارهقته الاحلام يقول...

عارفه ياسالي ...

أجمل حاجه ف الدنيا هي الذكريات حتي لو مكنتش سعيدة بدرجة كفاية

وصفك لكل لحظة كالعادة ماليان إحساس

انت دايما بقولك كده بس متاخديش عليها يعني :)

بس بجد عجبني أوي إحساسك ف البوست ده

بحس سعات كتير اننا ارواح طايرة ف السماء بس مش عارفين امتي لحظة النزول ع الارض


والارجح إننا هنفضل طايرين فوووق بس ياريتنا منطيرش لوحدنا

بحبك اوي :*

الحــ ــزين يقول...

الحــ ــزين
بجد كلنا محتاجين نقول للزمان ارجع يازمان
كلنا محتاج تانى انو يكون تفكيره واحاسيسه احاسيس طفل
بس مش قادرين
مين ينسى الزكريات
فكرتينى بالذى مضى
بجد موضوع جميل
دومتى بكل خير
وعلى فكرة اوعى تغيرى الصورة دى علشان جميلة اللى انتى حطاها هااا

'' حطام (ك) بقايا '' يقول...

احييك بجد من كل قلبي
لان قدرتي تترجمي حاجات جوانا يمكن مكناش عارفين نعبر عنها
كلماتك بتحسي كانها قريبة مننا قوي
بجد اسلوبك بسيط و حلو جدااا
تسلمي

Tamer Nabil Moussa يقول...

ايام زمان ايام لاتنسى

دائما على البال تكون وفى القلوب موجودة


مع خالص تحياتى

لفافة البردى يقول...

بجد كلام اتراكتيف اوى اوى كثير زكريات بنتذكرها زمان وبنحس بضيق وبفرحة فى نفس الوقت تمام لما نشعر بالمياة الباردة والسخنة فى نفس الوقت على ايدنا نشعر بالحزن لاشتياقنا لهذة الايام ولانه اصبح مستحيل ان نصل لها والفرح لاننا نتذكر ذكريات جميلة نتخيلها وتخرجنا من واقعنا ولو لبعض الوقت

جميل كلامك جدا حروف

تحياتى/افضل الخفاء

فكرة من الزمن ده يقول...

ايه ياروفي ده

كل دي ذكريات؟
جميلة اوي
وكلها شجن

واكد لك انها مشتركة بينا
وبين معظم بنات اسكندرية
وخصوصا الرومانسيين
اعتقد ان كل بنات اسكندرية رومانسيين


باغمض علشان اسمع صوت البحر

واشوف القمر وابص للسما بس


وامشي جمب سور الوحدة العسكرية اللي في مصطفى كامل وباكره شكلها في المكان ده باحس انه نشاززمخلي المكان شبه مهجور

وروحي بتترد لي اول ما اطلع تاني على البحر واحس بهوا البحر على وشي


واحب في الشتا لما امشي على البحر
ويطلع الموج
يخبط في العربية
ويغرق كل الناس

والهوا لما يجريكي ومتعرفيش تقفي


لما ازعل امشي لوحدي
مش بحب امشي مع حد
بحس اني باشكي للشوارع
والبيوت القديمة

والبحر بيسمعني
وبيسحب مني الزعل
ويرجعني البيت فرحانة ومبسوطة



والترام الزرقا اللي ممكن اركبها من اول الخط لغاية اخره وافضل جنب الشباك حاطة ايدي على خدي وسرحانة ومش عايزة ارد على تليفون او اكلم حد

محطة الشبان المسلمين فيها ذكريات كتيييييييير


تيتر ارشيف المحاكم

جو تاني في بيت جدي


ايه كمان
طلعتي حاجت كتير ياروفي
ربنا يسامحك


وافكار كتير في عقلي شغالة بس مش عارفة امسك فكرة واحدة منهم
عايزة تمسكي فكرة ليه انا عملت لك ايه


اسكندرية اميرة
عروسة فاكة الضفيرة



الباقي تببقي تقريه في فكرة
بس انتي اكسكلوسف يعني على طريقة عمرو اديب
علشان الكلام الجميل اللي كاتبتيه

فكرة من الزمن ده يقول...

فين انت
الناس فين
ولا عشان البوست جميل ورقيق ممنوع الاحتلال

فكرة من الزمن ده يقول...

طيب مش احتل
احجز بس

ميمايتي



ويويو


واحمد

وتندر

واسكندرانية

وكل الناس الشريرة

mimi يقول...

سالي

البوست ده مش ظاهر عندي في الريدر مش عارفة ليه؟

بس الذكريات القديمة ... سيبك أنتي ولا أحلي من كده

mimi يقول...

فرتي حبيبتي ...

حجزززززز لياااااا

حبيبة قلبي فكرة يا سكر

شيماء جمال(شيمو القمر) يقول...

قد كلامك مع خفة دمه بيوجع

حساكى شبهى كتير

بحب لما أبقى مضايقة أنزل لوحدى وأبص للناس وأرجع من غير هموم اكنى حطيت مع كل واحد قابلته فى الشارع هم منهم

بحب اركب ترام ابو دورين وابص من الشباك ومش عمرى احس بالوقت بحب البحر والقمر

كأنك قاعدة قدامى وبتوصفى مشاعرى دلوقتى

وحشانى قوى يا لولو
نفسى اشوفك انا دخلت المجمع عايزة اقابلك

تحياتى لك
شيمو القمر

كيكى عوووووو يقول...

وانا في عز الزحمة بحس اني لوحدي

انا بحس بغربة شنيعه!!!!
وتتفرجى ع الصورة وانتى مش فيها.. ابقى اتفرجى معاكى ع نفسى يمكن برضة تلاقيها!!!

momken يقول...

سيدتى عندما خلقنا الله

جعل لنا حياتين
حياه نعيشها واخرى نتذكرها

احساسك عالى اوى...ودافى اوى...وطريقه تعبيرك عما يعتريكى مبهره

دمتى فى قمه الابداع


تحياتى

thunder يقول...

ذكرى واحساس ماضى وعدم شعور بى الامان
هو دا حال كل الناس نفسهم الماضى يرجع وينسوا مسئوولية
ويحتموا ورا حد كبير علشان احساس الامان
بنحس بى الامان فى الزمان اللى فات اكتر ما بنحسة فى الحاضر يمكن لان دا عدم ثقة فى المستقبل ومقدراتها ولا لاننا متئهلناش نفسيا صح يعنى اية نقف ونشوف بكرة
لكن الاغرب بس ياحروف ان الكل بتجيله لمحة الخوف والاشياق للامان دا فى توقيت واحد تحسية منتشر اوى بين الكتابات اللى موجودة دلوقتى
اختى العزيزة بهنيك على البوست الجامد
جداااااااا
دمتِ يارب بكل حب و ود وفى رعاية وحفظ الله دائما يارب

youssuf يقول...

عدنا بعد غياب إجباري ...

حروووف ...
جميلة جدا ...
تدوينة صافية جدا تحمل الكثير من المشاعر و الحنين و الذكريات ...

حسيت انك نقلتيلي حالتك ...
تحياتي لكي و يارب تكوني بخير و بصحة دايما يارب

اسماء واحلام فى وجدانى يقول...

ازيك يا حرووووووووووووووووووووووف

مقصر جدا معاكى
بس ربنا يعدلها من عنده

صبرني يارب يقول...

اه فعلا انا كل ما اتفرج على صور قديمه اسرح كده

وما اكثر الصور القديمه عندي بقى انتى عارفه ان انا طاعنه فى السن
ههههههههههه

لو جيتى تسافري بره الصوره خودينى معاااااااااااااااااااااااكي

Tamer Moghazy يقول...

بجد...رغم اني اتاخرت عن الشغل لاني ما قدرتش اخرج من الذكريات اللي حطيتيني فيها..الا اني مبسوط قوي بعطور الذكريات اللي خليتينا نشمها معاكي.. واحساس الصور اللي خليتينا نلمسها وياك..
انا مبسوط اني جيت هنا ;)

donya يقول...

مساء الخير
اول زياره

مش كل الذكريات اللي يتقال لها كده
انا شخصيا نفسي ذكرياتي تنساني شويه
ده مايمنعش ان ذكريات الظفوله ياريت ترجع تاني انا شخصيا براجعها دايما خايفه انساها اصلها كانت جميله جدا

*تحياتي

غير معرف يقول...

كده برضه ياسالى
نسيتى مامتك خالص
فينك يابنتى لازيارة ولاسؤال
حتى وانا فى المرض لم تظهرى
ياريت تطمنينى عليكى
تحياتى

سمكه واحده يقول...

حروف
بينا انا وانتي علي اول طياره رايحه اي حته وهوب نسافر ونهج من ام الدنيا
اه بنحبها اه بس عاوزين نشوفها من بعيد
انا كمان فاكره تتر ارشيف المحاكم اللي كان بيجي يوم السبت بليل وخطوات الكعب بتاعه الشوازت سواء ستات ولا رجاله وتكتكتك

كمان وانا صغيره كنت ابص من البلكونهواقلب راسي لفوق عشان مشوفش غير السما ابص الاقي الجيران اللي فوق
هههههههههههه بس خساره مكنش فيه ابن الجيران بقي اممممممممم
بس سعات ابص وانا مقلوبه والدم كله في نفوخي ومش شايفه غير عرض السما والنجوم اللي فيها تيجي اختي مره واحده ضرباني علي بطني ونقعد نضحك واحنا صغيرين
اه شوفتي ياحروف دلوقتي مش عارفه ملاكي اسكندريه من ملاكي القاهره كنت بحب اشوف عندنا ملاكي القاهره معرفش ليه
ملايانه حاسيس ومشاعر وكلام جميل يا حروف
ذكرياتك ممتعه فكرتيني بايام جميله
انتي فين؟
وحشاني

مـجـنـووون يقول...

احساس الوحده بيمر علينا وبنحس بيه

ممكن نحس بيه لو افتكرنا ذكري جميلة
وممكن نحس بيه لو افتقدنا شخص عزيز
وممكن نحس بيه لو سافرنا مكان تاني

بس علي فكرة الإنسان عبارة عن ذكريات ولازم يفتكرها علشان يحس انه عايش وانا كان هنا من زمان

وانتي نفسك تطلعي بره الإسكندرية علشان تطلعي بره الصورة

انصحك خليكي في الصورة أحسن لأن بره الصورة مش حلو خالص

الغربه صعبه والبعد عن الأهل والأصدقاء والأحباب أصعب

انا نفسي اشوفها وادخل دوا الصورة
ايه رائيك نبدل مع بعض

جو الصورة وبرا الصورة

تقبلي مروري
مجنووون

maha يقول...

سلام عليكي يا حروف
فرحانه اوي اني بكتب رد عندك ..حاسة بكل ذكري و معني جوه حروفك .. فكرت كتير اوي في القطة اللي برغم انك طمنتيها لكنها برضه خافت و عارفه زعلك ساعتها لما جريت من قدامك .. سمعت صوت البحر و حسيت بالشمس و لونها في عيني و انا مغمضة و لكما كنت مخنوقه امبارح و مشيت في شارع كبير اوي مش حاسة بالبشر اللي حواليا زي ما انتي عملتي و انتي زعلانه
جميلة حروفك يا حروف
ربنا يسعدك دايما و خليكي متمسكة بكل حاجة صغيرة بتحبيها جواكي
سلام
مها

Nostor Azzuro يقول...

كلام روعة

على طول مدونتك هايلة

rony يقول...

حبيبتى حروف


هى الحياه ايه غير شوية ذكريات فوق بعض
اللى احنا من غيرها منعرفش نعيش مستقبلنا

تحياتى لقلمك المبدع